Á næstu dögum mun MS markaðssetja D-vítamínbætta léttmjólk. Þetta er gert skv. ráðleggingum Embættis landlæknis og rannsóknastofu í næringarfræði við HÍ og Landspítala, en D-vítamínneysla landsmanna er talsvert undir ráðleggingum.

D-vítamín er hálfgert vandræðavítamín fyrir þá sem búa á norðurslóðum. Það er myndað í líkamanum með hjálp sólarljóssins en þegar sólar nýtur ekki við er mikilvægt að fá það úr fæði. En þá er úr vöndu að ráða þar sem afar fá matvæli innihalda D-vítamín frá náttúrunnar hendi, þar í raun aðeins um að ræða lýsi og feitan fisk.

D-vítamínneysla ungmenna er sérstaklega lág. Í nýlegri rannsókn á mataræði 15 ára unglinga á vegum rannsóknastofu í næringarfræði við HÍ og Landspítala kemur í ljós að innan við 5% stúlkna ná ráðlögðum dagskammti af D-vítamíni og innan við 10% drengja. Þegar litið er til þess að á yngri árum er beinmyndun í hámarki og þörf fyrir D-vítamín sérstaklega mikil þá er ljóst að bregðast þarf við. Það gerir MS með D-vítamínbættu léttmjólkinni, en þar fá neytendur bæði kalk og D-vítamín sem nauðsynleg eru fyrir vöxt og viðhald beina. Fyrir í vöruvali MS af D-vítamínbættum vörum eru Fjörmjólk, Stoðmjólk, Smjörvi og Létt og laggott/SS-fréttatilkynning.

Árið 2011 nam innflutningur nautgripakjöts 434 tonnum en hérlend sala af nautgripakjöti á sama tíma u.þ.b. 2.699 tonnum (m.v. 70% nýtingarhlutfall fallþunga). Selt nautgripakjöt hér á landi árið 2011 var því 3.134 tonn miðað við framangreindar forsendur og hlutdeild innflutts nautgripakjöts því um 13,9% af heildarsölu ársins.

Samkvæmt innflutningsskýrslum frá Hagstofu Íslands kom nautakjötið innan fjögurra stærstu tollflokkanna (alls 428 tonn) frá 9 löndum. Þessir tollflokkar eru „Frystar nautalundir“ (64 tonn – þar af 55 tonn frá Þýskalandi), „Frystir nautahryggvöðvar“ (48 tonn – þar af 26 tonn frá Þýskalandi), „Frystir nautalærisvöðvar“ (85 tonn – þar af 42 tonn frá Hollandi) og „Annað fryst úrbeinað nautgripakjöt“ (231 tonn – þar af 110 tonn frá Hollandi).

Stærstur hluti nautakjötsins (innan framangreindra tollflokka) kom frá Hollandi eða 156 tonn, næst mest kom frá Þýskalandi (142 tonn) og þá frá Danmörku (74 tonn). Auk þessara landa kom nautakjöt til landsins (í framangreindum aðalflokkum) frá Bretlandi, Nýja-Sjálandi, Austurríki, Litháen, Póllandi og Spáni/SS.